فهرست ديوان آخر حدود الوطن

الإهداء

*

جمرتى حرقت ايديا

*

سنين واقف على العتبات

*

المريد

*

سبت النور
*

طرح السنه

*

غنوه مخنوقه

*

ولسه مستنى

*

حكايات لامبارح وليك

*

أبويا

*

أمى

*

لمسحراتى الوطن

*

الدمع سال ع الخد

*

قلبى اللى فاتحه

*

واقف ع السلم

*

الجرح مفتوح

*

للباطل ألف حجه

*

هو انت بجد محايد

*

كل دوره وانتم طيبين

*

آخر حدود الوطن

*

وطن مش بتاعك

*

فى الصف والا الطابور

*

كل عيد شهيد

*

اللى جاى زى اللى فات

*

الحاره

*

بيحصل كل يوم

الإهداء

الإهداء

لحاجات كتير جايه بكره

على عبد العزيز

جمرتى حرقت ايديا

والصليب على كتفى علم

الصحابه نسوا الوصيه

واللى كان قدامى سلم

******

سنين واقف على العتبات

سنين واقف على العتبه
وباستنى يا باب الخلق
تفتحلى
أزور السيده الطاهره
وأقيد الشمع فى مقامها
واستسمحها تقبلنى
أكون واحد من المحاسيب
ولو تقبل
أعبى دموعى فى القربه
واطوف أروى الحكاوى سبيل
عن العشاق والشهداء والمجاذيب
وبل الريق يفكرنى
بعطش الورد
يوم البغى ساد سيفه
فصار العطر أيقونه
تقيد السكه وتنور
دروب مليان بالعشاق
**************

قصيدة (سنين واقف على العتبات) نُشرت للشاعر على عبد العزيز فى موقع دنيا الرأى رابط : http://pulpit.alwatanvoice.com/content-200400.html

المريد

سبحانه من سواك
عود غاب بيطرح تين
والفاكهة للمساكين
وناى بيعزف
ترنيمات المريمات
أوراد
حبات دموعك يامريد
سبحه
والبكى تسابيح
هاتسيح ف أرض
ربك الواسعة
تسعى
من العشا للضحى
وتزور جميع الأضرحة
بالفاتحه والصلوات
والذكر فى الحضرات
(وبانت سعاد
هام الفؤاد
والوجد زاد)
القلب بات مبتول
أم الجسد مقتول
عاش ونفسه ينول
نظره ومدد تحييه
وترجعه لأراضيه
من تانى يطرح التين
والفاكه للمساكين

سبت النور

لا سبت نورك آخر الأحزان
ولا كان بداية الألام
ويا حد الخوص
ماتكحليش بالبصل عينك
وارمى النظر لبعيد
هاتشوفى مين اللى خان
قبل خميس العهد
ياحاضنه خشب الصليب
لبعد عيد القيامه
خصيتى مين بالخلاص
وصيتى مين ع اليتامى
صفين من العشاق
شافوا فى الانتظار العلامه
عشش على الإكليل
بومه وتلات غربان
أمانه يا رهبان
ما تعملوش دم الغريب
قربان
أنا شعرى مش قصايد
فى ندوه أو ديوان
أنا شعرى حزن صايد
الفرحه من الزمان

طرح السنه

الدمع نبت ع الخدود أشجار
هنضل مع صبار
أنا قلت أجيب
طرح السنه أشعار
عمنول البرتقال
مابل ريق العشمانين فى الخير
أنا قلبى زى الطير
تايه فى ملكوتك
يهدى الحزانه غناه
للفقير قوتك
ماتهز جزع النخيل
وتوفى بوعودك
أنا من زمان منتظر
ياسمره مولدك
بالدم هانعمده
ونقيد بخور عودك

**************

قصيدة (طرح السنه) نُشرت للشاعر على عبد العزيز فى موقع دنيا الرأى رابط : http://pulpit.alwatanvoice.com/content-200425.html

غنوه مخنوقه

قولى لعرايس بحرك
اللى ع الشطوط واقفين
إنى خلاص مليت
من لعبة الفارس
ولا عدت قادر
أجدل شعور البنات
يوم الحصاد غله
ماعلش سامحينى
كل اللى باقيلى
حبة دموع فضلان
من غربة الأيام
وغنوه مخنوقة
ما بين شفايف ناى
وجناح حمام زاجل
وحصان شريد هربان
من خنقته الحواديت

ولسه مستنى

يا للى اتسع المدى
صدرك
سايبنى ليه تايه
فى فوضة الأحزان
يا ما وعدتينى
إنك تضمينى
لما الحمام يرجع
من زفة المحمل
ضل الحمام
واللاه
برك الجمل
أجل الزفه واللمات
من يومها وانا قابض
ياسمره ع الجمرات
وسايبه تكوينى
باللحظه والسنوات
يمكن يفز الجمل
أو ترجع الحمامات

حكايات لامبارح وليك

الدنيا ديوان من غير عنوان
بدا بعبارة كان يا ما كان
جوه الحواديت تلقى العفاريت
وتلاقى كمان أمرا وشطار
والملك محتار ووزير بمشوره
تقيد التار
فيه جحا بحمار
داخل مباراه
مع فرقع لوز
وأخوه أراجوز
الشاطر يعرف مين ها يفوز
وقف الخطاب ع الباب
وابن الحطاب
جاب دوا وعلاج بنت السلطان
غلاب يا نصيب يانصيب غلاب
البحر يهيج والموج قلاب
وعجوز صياد بيقولى يا واد
لو ترمى الشبكه استنى السمك
إوعاك تستنى علاء الدين
معهوش مفتاح ولا ليه مصباح
تدعكه هيقول شبيك لبيك
حظك من كدك صنع ايديك
أنا رحت البير
ومليت الزير
وعملته عشان الكل سبيل
إن كنت نوايه اسند ويايه
نطول الغابه نبقى دليل
ودليلى احتار والليل ستار
والقط اتخبى فى عبه الفار
وآهى دنيا وماشيه بالمندار
وخدانا صغار م الدار للنار
ترمينا فى وسط جبال أسرار
مغارته بتفتح بالسمسم
وياقوت مرجانه بيتقسم
بين العصابات
إمبارح قالوا التعلب فات
وياه أسرار كل الحكايات
خنزيره حزين على الدب
رماه جهله وغباه
فى قرار البير
والبير سواقيه
بتدور بقادوس
بتعلى فى ناس
على ناس بتدوس
والعاقل ياخد منه
دروس
مش كل طير جناحه
بيطير بيه فى الفضا
ساعات الكون بحاله
ما يكفى الفضفضة

أبويا

أبويا اللى شايل
هموم فوق همومه
عشان رزقه
يوصل لياليه بيومه
ومسك العرق
اللى ساكن هدومه
شهاده ودليل
على انه قضاها
عابر سبيل
وعايش وراضى
برزقه القليل
يخاف من خياله
وينصح عياله
إذا هب ريح
يسدوا البيبان
ويمشم فى حالهم
فى ضل الحيطان
يوطوا فى صوتهم
لإن الودان
توصل كلامهم
لسكة مهالك
وكان غيره سالك
وهو غشيم
إذا حد يدعى
على الظالمين
يهلل .. يكبر
ويصرخ آمين
ــــــــــــــــــــــــــــــ

أمى

(1)

نحتوكى م الصخر مسلة

نقشوا المراثى على جبينك

أخد الزمن منك ماخلى

إلا ابتسامة بتزينك

تقدر على الحزن تهده

والبرد لياليه بتعده

الصيف ياواد اتأخر ليه

إحنا كفتنا على قده

(2)

أمى اللى ورثت

نخلتين عن أبوها

لما البلح يطرح

تقول آهى فرجت

هنسد دين السنه

ونهادى

واللى فضل هنشفه لصيامنا

نسيت بأن النخلتين مايكفوا

وإن الكلامده

أيام ما كان النخل

ملك لأبوها

تضحك تقولك

ربنا يفرجها

وتدعى لك ولأهله بالستر

لمسحراتى الوطن

برج البلابل مش ملكى

وانته اللى ناقش بلاسلكى

القاهرة وأحلى مافيها

بكل ناسها وحواريها

فصوص كلام عققدك زينها

ماسح دموع ليل أحزانها

وفى الحسين يعلى أدانها

حشد الجيوشى فى لسانها

أبو العلا بينادى بولاق

الأزهر ينور كل رواق

يفتينا فى الدين والثورة

وفى حب فلاحه وسمره

مختار نقشها بأزميله

إنته اللى فى الفن زميله

سحرت طه أديب الايام

عم النديم والشيخ درويش

وأحمد عرابى أمير الجيش

سحرتهم صحيوا ما ناموا

والمجد رجعت أيامه

إنته اللى قلت زمان قبلى

الطبل طابلك وأهو طبلى

أمنيه واحده ياعم فؤاد

ألفها قبلى وبحرى

أدب وارقص زى الدب

واتسلى بالقهر واللب

فى بحرها أغطس وأقب

أرمى الشبك مع صيادها

وألاغى زغاليل أبراجها

وأغنى ويه السقا سبيل

من بعد ضيق ربى فرجها

الدمع سال ع الخد

بيروى فى التفاح

لو الهموم ع القد

كانت العيون ترتاح

قلبى اللى فاتحه

قلبى اللى فاتحه

ع المشاع للكل

فيه اللى عده وفات

وفيه اللى قاعد يطل

وفيه اللى داس بالمداس

وفيه اللى زرعه فل

طهرتهم الخناس

وطرد منه الغل

والحب جعله أساس

ولا أرضى يوم بالذل

إن كنت ياقلبى نحاس

أنا ابيضك واجليك

وأشيل قسوة الناس

اللى رموه فيك

واقف ع السلم

واقف ع السلم

يدهن فى عمود النور

باللون الفضى

يتعب ينزل يرتاح

بنفس فى سيجاره

وشفطة شاى

يجى من ع الشجره غراب

ينبش فى عمود النور

يرجع تانى يدهن فيه

وكأنه سيزيف

والصخره غراب

والريس هو اللعنه

الإلهيه اللى بيسلمه الشغل

الجرح مفتوح

(1)

الجرح مفتوح ما اندمل

ف حياتنا إيه اللى اكتمل

كل الحاجات يا دوب شبه

الحب إيه

شبكة إيدين

إن هب ريح يتفرقوا

لا حضن ولا مصيده

سرى اللى كان ساكن ف بير

أصبح خبر ملو الفضا

(2)

حلمى اللى شيعته

لمثواه الأخير

كل ما أصحى أتقيه

واقف يطلع لسانه

ليا ولأصحابى الكتير

(3)

ليه الصحاب بيبدأوا

دايا بسيرة أبو بكر

وينتهوا بقصة يهوذا

الطيبين ما عاد لهم

ف الدنيا عوزه

للباطل ألف حجه

وكل باطل حجته ف ايده

والحق واقع حجته منه

مين اللى قادر يلمه

ويشيل على الكتف همه

انت النخيل الهزيل

قادر بكتفك تشيل

والمره نخ ومال

لا بتشتكى للزمن

ولا تلعن الحمّال

الشعر مش هتاف

ولا عمره مره خاف

يهتف ف وقت الجد

الشعر ملهوش حد

ف الحق لسان ورد

بيقوى بيه الضعيف

ويكشف كل زيف

ويبقى حصان وسيف

وف المعارك صد

الشعر ملهوش حد

متوقفوش حدود

يجتاز كل السدود

ويكسر القيود

فى غنانايبقى وعود

وللحريه الورد

الشعر ملهوش حد

هو انت بجد محايد

التزم الصمت

عبر عالموضوع بهدوء

خلى علاقتك بالأحداث

الفرجه على التلفاز

إن كنت هتغضب

ضيف ع النص

صوره كلب بينهش

جثث الناس

أقول إن المنظر

يا حرام

مرعب خالص

وإن خروج المخرج عالنص

بيشكل كارثه على الإنسان

وبكل حياد اختار كلمات

تشبه بيانات حركات

السلم الآن

وانسى حكايات

حزب الله وحماس

صراع ووجود حق وباطل

هنكمل بعد الفاصل

كل دوره وانتم طيبين

وإيه يعنى انفعل ميدو

ما مجد الماضى هنعيده

وهنجبلك يامصر الكاس

ونشرب نخب الانتصارات

وهيرفرف علم ورايات

فى إيد شربات

بنات مغسوله بالشامبو

وإيه ذنبه

إذا العباره واخده شهادة الجوده

وإذن ملاحه من بنما

وفين بنما على الخارطه

أكيد مش جنب بنى سويف

يا زمن الزيف

كفايه حرام

من الاستاد طردهم

وفى القطارات حرقتهم

وعند ميلانو فى سفاجه عملتوهم

وليمه لذيذه للأسماك

ومين سماك وطن لينا

وفيك مشطوبه أسامينا

آخر حدود الوطن

آخر حدود الوطن

صبحت جدار البيت

بتحن ليه للبلاد

على أرضه ماحبيت

كل اللى بينك وبينه

حكايات ابوك وامك

وكم سلام فى جواب

م الخاله والعمه

لساك بتحلم برضه باللمه

كل الموالد خلاص

كت شرك واتفضت

والوحده صبحت عباده

متسنكر الأبواب

والقهوه ساده

وشاى مخاصم

رصة الكوبيات

ولا عدش فى البلكونات

قلل بنعناعه

ورد الهدوم دبلان

من فوق حبال الغسيل

كل اللى بقى منشور

إسدال كئي اسود

**********

قصيدة (آخر حدود الوطن) نُشرت للشاعر على عبد العزيز فى موقع دنيا الرأى رابط : http://pulpit.alwatanvoice.com/content-200879.html

وطن مش بتاعك

هو انت واقع

من حصان غازى

نساك هناك

وروُح على بلاده

ولا الغزاه وزعوا

الأرض ع الأحفاد

وسابوك تدافع

عن وطن مش ليك

هكسوس على مماليك

فرس ويونان أتراك

ياعم مين خلاك

تعشق تراب

مالكش فيه ولا قبر

والعيشه مر وقهر

وبالحساب والجبر

تجيب عشاك فتافيت

فى الصف والا الطابور

ويبقى ف صفك الأول

فى يوم ما تكونى محتاجه

ولما الدنيا تضحكلك

بترمينى ولا حاجه

أنا المحروق فى بنى سويف

وغرقان خالى ف سفاجا

وهل فاكره أهالينا

فى يوم ما القطر خلاهم

يدوب فحمه على الجوزه

وكام واحد شنق نفسه

من العوزه

أكيد ناسيه

وجاحده القلب يا قاسيه

وفاكرينك

عرفنا ودمنا مرجان

مرصع تاج على جبينك

وبتحبى اللى ناهبينك

وسارقين خير فدادينك

كل عيد شهيد

الأضحى مش زى عاشوراه

بس اللى جامع بين الاتنين

الأولانى تاريخ قريناه

والتانى شفناه ف صوره

تشهد حبال المشنقه

على انه كان راجل صحيح

واقف قصاد الموت جبل

ماهزه ريح

نطق الشهاده على الملأ

بلسان فصيح

ما خبى وشه

اللى استخبوا الجلادين

صدام حقيقى انته حفيد سيدنا الحسين
*************

قصيدة (كل عيد شهيد) نُشرت للشاعر على عب العزيز فى موقع دنيا الرأى رابط : http://pulpit.alwatanvoice.com/content-200930.html

اللى جاى زى اللى فات

مين اللى قال المسأله صعبه

وانتى اللى ياما محملك

شال كسوة الكعبة

وعشان عيون قطر الندى

حنيتى كل البنات م القاهره لبغداد

بغداد على خدها صار الفرات عبرات

ودجله تصرخ ألم وكلنا فى سكات

طيب مين فتح للتتر البحر والسموات

تحرق بنار غلها الأرض والنخلات

ده مش خيانه يا وطن

ده كل يوم خيانات

الحاره

الشمس خافت

تدخل الحاره

أصل العيال أشقيا

خطفوا الدفا منها

وفى عبهم خبوه

وعيال بتعكس ضيها

شقاوه ع المرايات

وبنات بتشكله

قمصان سريسى كتير

لسه ما نشفتشى

وما عادش ليه

عندها للعرايس سنان

بيحصل كل يوم

(1)
شمس امبارح
طلعت بدرى
قبل الوقت بتلتين ساعه
موجه البرد بتقرص عضمى
وأنا بسمع صوتك يا إذاعه
رفعت يقرا ف صورة مريم
سومه تصبح ع اللى معانا
ومذيعه عماله بتنصح
هدى السرعه تعود بسلامه
ف البراد للشاى ع النار
فول .. طعميه .. جبنه فطار
حد بيقلى الصبح بطاطس ؟!!
مركب واقفه هناك ف المغطس
عم فتوح يفتح شباكه
الصياد بيلم شباكه
طرح النهر الخير بشباره
القشاش كمل مشواره
الركاب نازله محطاتها
خالتى ام احمد مين حططها
خالتى ام احمد مين حططها
لفه الدنيا حوايا وشايله
فوق الراس اقفاص سبوبه
كارو بيجرى ف الشبوره
بيجرها جحش بيتاوب
الأسئله ملو السبورة
شاطرمين فيكم هيجاوب
فرحانه الشنطه بكراريسها
والمدرسه تحضن تلاميذها
المريله صبحت فستان
وعروسه بتستنى حصان
جاى عليه فارس أحلامها
رسمناه فى الكراس بقلمها
تجرى وتعدى الأيام
تلقاء واقف
تانى بقولها
شمس امبارح
طلعت بكره
(2)
البياعين صاحيين بدرى
عربيه الفول والخضرى
وقبل نور الشمس ما بان
القسط على كتف اللبان
ده صاحى من نومه مكسل
عامل اصطباحه بمعسل
وشاى تقيل زى دماغه
ع الناصيه عصافير بيلاغو
عصفورة على سلك مكهرب
الكل م الحق بيهرب
رايحه التلامذه مدارسها
شوارعنا مين اللى كانسها
فقير فطاره فى منديله
كنا زمان بنغنيله
خمر العجين وامى بتخبز
كلتين دقيق وحفنة رده
أبويا صابح يتوضا
ولاويه بوزها الحنفيه
من بعد أبريقها ما صدا
كان وارثه عن أبوه وجدوده
جديد وايامه يعدوه
ومهما بتلف الأيام
الصبح مابيخلف وعده
(3)
الإيدين جوه الجيوب
والكوفيات ع الودان
الزفير طالع بيرسم
ف الفضا دوامات
لسه بدرى ع اللى بعده
جى هناك الميكروباص
أجرته زياده شويه
بس نوصل ف الميعاد
المعاد ده سيفه حامى
ماشى يقطع ف الرقاب
(4)
بيشب النور من حب الضلمه
ويرمى فى حجر الدنيا نهار
هو انتا لسه فى العسل نايمين
والبياعين بيلفوا بالجرانين
مافيش جديد
إلا تاريخ الصدور
ناولنى صحن الفول
دش البصل هتفوق
وتعالى نشرب شاى
رص المعسل
على الحجر بقى كيف
تفاحه تحرق صدورنا
وفى بقهم سكر
هو انت لسه
برضه بتفكر
ياعم ارمى الهموم
علشان تشيل أكتر
(5)
طيب وشايل طيبه
رزقه اللى حطه فى الغيط
قسطين لبن
بتلف بهم على البلد
تفتح لها كل البيبان
صافى الحليب
قشطه نهاركم كلكم
مجبوره رزقه مروحه
بالرزق والزاد القليل
وهو صابر ع العليق
لحد مايروح البلد
طول عمره شايل حمله
مع إنه
ساعات كتير من كربها
بتضربه
وحر أسفلت الطريق
يلسعحوافره يوجعه
جلده اللى كرمش م الزمن
ما عادش قادر ع الشتا
هو اللى قضاه كده
صبر ورضا
وهى تشقى على العيال
راضيه بقلة رزقها
طيب وشايل طيبه

*************

قصيدة (بيحصل كل يوم) من ديوان (آخر حدود الوطن) نُشرت للشاعر على عبد العزيز فى موقع دنيا الرأى رابط : http://pulpit.alwatanvoice.com/content-200311.html